Obradoiro de Nadal

 Xa chegou o Nadal á Biblioteca do Castro Alobre. O xoves e o venres tivemos un obradoiro moi divertido da man de Noa Pérez, profe de galego. O alumnado d Club de lectura fixo uns adornos ben bonitos, renos e bonecos de neve,
que servirán para adornar os agasallos de Nadal. Para a semana seguiremos decorando a nosa biblio. Que sorpresas terá este curso a nosa árbore?

Castelao

No ano Castelao, a biblioteca organizou unha visita á exposición Castelao. Mirar por Galicia. O alumnado do Club de lectura e o equipo de correspondentes da radio desfrutaron dunha mañá na cidade da Cultura co obxectivo de afondar na figura de Castelao.

Lello de Porto

 Marisa e Fernando, membros do equipo da biblioteca, estiveron en Porto e visitaron a librería Lello. Entre os libros descubriron 1894, a lectura do club, e mandáronnos estas fotos.

1984

 1984 é o libro de George Orwell que xa está lendo o club de ciencia ficción. Para empezar, podemos afirmar que esta é a vida antes do club de lectura

E esta será a vida despois do club

Achegouse á Biblioteca o alumnado, e tamén o profesorado que quere reflexionar sobre o libro de Orwell, para ir coñecendo as liñas xerais da historia que Fernando lles explicou como introdución á lectura. Nunhas semanas verémonos de novo para comentar as primeiras impresións.

Entre visillos

  Entre visillos de Carmen Martín Gaite transportounos a uns anos atrás que parecen lonxanos, pero non o son tanto. Unha lectura que gustou e que nos recordou a vida das nosas nais ou avoas. As aspiracións das mulleres, a dificultade en romper coas normas impostas ou o sufrimento calado son algúns dos temas que planean nesta lectura. 

Convén non esquecer esta forma de vida, para poder valorar como se merece a loita de moitas mulleres. Grazas a elas, podemos desfrutar da vida que temos hoxe.

Hipólito de Eurípides foi a outra lectura coa que se atreveron algunhas Curuxainas. Volvemos á traxedia grega, despois de ter lido Medea. Impactante monólogo de Hipólito, o papel da nodriza como celestina, a terrible decisión de Fedra e, por suposto, a intervención desa deusa Afrodita que, para vingarse de Hipólito, utiliza a Fedra. Divinidade vingativa.

Unha xuntanza de medo

 

Anunciando o Samaín, reúnese o Club de lectura de 1º e 2º de ESO para adornar a Biblioteca. Como premio unha sorpresa "lectora". Que libro lle tocou a cada quen? A profe Teresa escolleu lecturas de medo e repartiunas entre as alumnas. Na próxima xuntanza falarannos desas historias terroríficas.

1984 de George Orwell

 Xa temos na Biblioteca a primeira lectura do Club de ciencia ficción. Agora, desfrutaremos coa súa lectura e, proximamente, compartiremos experiencias lectoras.

Lendo a Roald Dahl

 Comezamos as xuntanzas do Club de 1º e 2º ESO lendo Cuentos en verso para niños perversos.

Club de ciencia ficción

 Hoxe foi a xuntanza do Club de lectura de ciencia ficción que coordinarán Carlos Merino (profesor de Filosofía) e Fernando F. Rego (profesor de Física e membro da Biblioteca). Presentaron a temática na biblioteca ao alumnado de bacharelato que está disposto a compartir estes momentos lectores.

Comezamos a ler

Nada mellor que empezar o curso que falando de libros e iso foi o que fixo o Club de lectura do profesorado.

Compartimos as lecturas do verán: Como bestias de Violaine Bérot, Grand Hotel Europa de Leonard Pfeijffer, Zuleijá abre los ojos de Guzel Yájina, Helada en mayo de Antonia White e Merlín e familia de Álvaro Cunqueiro.

Un comezo excepcional! Agora emocionarémonos con Hipólito de Eurípides e desfrutaremos con Entre visillos de Carmen Martín Gaite.

Despedida do Club

 Na última xuntanza tocou despedirnos do Club de lectura por este curso e tivemos unha reunión moi completa. Primeiro falamos de Invisible de Eloy Moreno (gustou moito esta historia) e despois, mentres merendabamos, falamos dos plans do verán e, por suposto, das lecturas que temos agardando para eses dous meses de vacacións... Algunhas son: Mentira de Care Santos e Asesinato para principiantes de Holly Jackson.

Despois, reunímonos co Club de lectura do IES Chano Piñeiro de Forcarei, mediante unha vídeo chamada. Con este grupo tan divertido, falamos de libros e quedamos en facer unha xuntanza o vindeiro curso para poder coñecernos en persoa.

Conversando de libros

 Última xuntanza do Club na que, ademais de compartir uns petiscos, falamos de libros. O alumnado recomendou lecturas para o verán e que, o curso que vén, servirán para iniciar as nosas xuntanzas.

Feliz verán e felices lecturas!!

La colonia

La colonia de Audrey Magee foi o último libro que, este curso, compartimos no Club de Lectura do profesorado. Unha boa elección para reflexionar sobre as linguas, as colonizacións, as esperanzas e as ilusións frustradas, entre outros temas.

O detective Ferruchi

 O día do Libro reuniuse o Club do profesorado para comentar O detective Ferruchi de Marta Villar.

Unhas cartas moi especiais

 

Onte tivemos unha xuntanza moi especial. Chegaron, por fin, as cartas que nos escribira o alumnado do Club de lectura do IES Chano Piñeiro. Foi moi emocionante ler o que nos contaban sobre o seu instituto e sobre as súas lecturas favoritas. As nosas cartas xa van en camiño. Agora só falta facer unha reunión en vivo alá polo mes de xuño.

Lendo poesía

 Despois de compartir experiencias do Entroido, o Club E ti que contas? leu poesía. Fran Alonso cos libros O meu gato é un poeta e Poemas birollos para ler cos ollos foi o autor escollido. Ademais, xogaron coas palabras e pasaron un bo rato con esta lectura e as ocurrencias de cada un. 

Finalmente, quedounos claro que temos grandes poetas neste grupo!