22 segundos de Eva Mejuto, próxima obra do grupo de Bacharelato.

Esta será a próxima obra para o alumnado de Bacharelato. A xuntanza terá lugar o luns 18 de decembro e contaremos coa presenza da autora no centro.

Primeira xuntanza do alumnado de Bacharelato do club de lectura Curuxaina.

O pasado mércores 15 de novembro o grupo de Bacharelato do noso club de lectura reuniuse na cafetería do centro para comentar dúas obras de banda deseñada relacionadas polo tema: a diversidade sexual e a aceptación desta diversidade .
As obras eran: El azul es un color cálido de Julie Maroh:

Foi a peferida polo alumnado. Nela a protagonista Clementine descobre o seu lesbianismo e ten que enfrontarse a falta de aceptación da súa orientación sexual nun contexto moi complicado .

O máis duro da obra , salientaron varias rapazas, foi a reacción dos pais, de total incomprensión. O máis positivo, e co que nos quedamos, as palabras de Enma, a rapaza que será a parella de protagonista: Só o amor pode salvar este mundo. Por que debería avergonzarme amar?

A segunda obra : Fun home. Una familia tragicómica de Alison Bechdel. 

O alumnado indicou que fora unha obra difícil de ler pola cantidade de referencia literarias e mitolóxicas . Pola contra, si que se salientou de positivo a valentía da autora de contar a súa propia vida e facelo con humor e sen rancor.

A hipocrisia , a aparencia , a falta de aceptación foron os temas destacados da obra e o pai de Alison o verdadeiro protagonista por ocultar baixo un falso matrimonio perfecto a súa condición de homosexual.

Como conclusión, despois da conversa, o alumnado valorou moi positivamente e que se inclúan entre as lecturas novelas gráficas e entre os temas das obras aqueles que teñen que ver coa coeducación e coa igualdade.

A caixiña dos rancores, novo título para o grupo da ESO.

O grupo da ESO do club de lectura Curuxaina reunirase de novo o mércores 20 de decembro para comentar A caixiña dos rancores de Hector Cajaraville. Contaremos nesta ocasión coa presenza do autor.     

Reunión do grupo de lectura de ESO para comentar De repente en lo profundo del bosque.

O pasado luns 6 de novembro reuniuse o grupo de lectura de ESO para comentar De repente en lo profundo del bosque de Amos Oz.

Na xuntanza destacouse o simbolismo e lirismo da obra e entre os temas que foron apuntados como principais atópanse: a incomprensión cara ao diferente, a soidade, a necesidade de vivir en comunidade,

Entendemos a obra como unha parábola na que a desaparición dos animais e a vida sen eles é o resultado do desprezo, o rexeitamento polo diferente e tamén da falta de comprensión que fan imposible a convivencia. 

En De repente lo profundo del bosque a memoria loita contra o esquecemento e os seus personaxes divídense entre os que asumen o que é aceptado pola maioría, é dicir, a desmemoria e aqueles que se rebelan e se resisten a asumir o presente . 

Na obra, como na vida, o final está cheo de incertidume e todas as posibilidades poderían ter lugar.

El bar de las grandes esperanzas , próxima lectura do profesorado do club Curuxaina.

E xa temos nova obra para ler no grupo do profesorado neste primeiro trimestre:

O grupo do profesorado comenta Del color de la leche de Nell Leyshon.

O grupo do profesorado reuniuse o pasado xoves 26 de outubro para comentar unha obra que a ninguén deixou indiferente. Conmovedora, intensa, auténtica foron algúns dos adxectivos que saíron á hora de calificala e rabia, tristeza, dor, algúns dos substantivos para definir as sensacións que produciu nas lectoras. 

Os malos tratos, abusos, discriminacións que padecen as personaxes femininas da obra contrastan coa dignidade que a protagonista mostra ante eles. Mary é a superación, a rebeldía e a escrita a súa liberación.

Na xuntanza destacouse o estilo, a verosimilitude e coherencia de quen escribe e de como o escribe. 

Outro aspecto que se sinalou foi o ritmo da historia que vai desde o presente da escrita ao pasado dos sucesos que se contan, nunha estrutura circular na que o comezo remite ao tráxico final no que entendemos a présa, o pouco tempo que di ter a narradora.protagonista.

Desde o noso club de lectura Curuxaina, recomendamos El color de la leche porque gozamos coa súa lectura e tamén coa posterior posta en común e felicitamos a Nell Leyshon por ter escrito esta marabillosa obra.

Del color de la leche, próxima obra do grupo do profesorado.

O próximo xoves 26 de outubro teremos unha nova xuntanza do grupo do profesorado, esta vez para comentar  a obra Del color de la leche de Nell Leyshon.
Será na cafetería do centro a partir das tres da tarde.

Xuntanza do grupo do profesorado en torno a O anxo negro de Manuel Gago con visita ao mosteiro de Armenteira.

O pasado xoves 5 de outubro reuniuse o grupo do profesorado nunha comida de benvida ao novo curso e tamén de reencontro coas compañeiras e compañeiro que xa non están no centro pero seguen formando parte do noso club.

A obra que comentamos foi O anxo negro de Manuel Gago, da que destacamos o ben que reflexa a realidade do saqueo do noso patrimonio, a traballada estrutura e as referencias históricas. O vídeo que recrea a novela foi moi loubado na xuntanza.

Esta obra préstase a facer un roteiro polos espazos que recrea, pero a falta do percorrido pola Costa da Morte, completamos esta primeira reunión do curso cunha visita guiada polo mosteiro de Armenteira que nos queda máis perto e que ben podería ser un dos espazos de O anxo negro.

Grazas Sabarís por organizar esta posta en marcha do noso club de lectura neste novo curso!

O club de lectura Curuxaina en marcha no curso 2017-18.

Comeza a nosa andaina neste novo curso e faino con novidades nos grupos de alumnado. Dado o elevado número de rapazas e rapaces de Bacharelato (28) que se apuntaron para formar parte do club neste curso, optamos por facer un grupo exclusivo desta etapa.

Feita a primeira reunión, decidimos, nesta primeira avaliación, que as nosas lecturas versasen sobre o tema da diversidade sexual . Comezamos con dúas obras de banda deseñada ( dado o éxito que o curso pasado tivo este xénero). Estas obras son: El azul es un color cálido de Julie Maroh e Fun home , una familia tragicómica de Alison Bechdel.

O outro grupo de alumnado está formado pola rapazada dos catro cursos de ESO (24). Tivemos tamén a primeira reunión e xa estamos lendo a primeira obra do curso, unha obra narrativa que ten moito de poética: De repente en lo profundo del bosque de Amos Oz: 

Por último, o grupo do profesorado xa tivo a súa primeira xuntanza para comentar a lectura posta a final do curso anterior: O anxo negro de Manuel Gago, da que daremos conta na entrada seguinte.