xoves, 16 de decembro de 2021

Xuntanza con Héctor Cajaraville

Héctor Cajaraville na visita e xuntanza co alumnado de 1º e 2º da ESO fixo un oco para asinar libros da rapazada do Club de lectura. Mostrouse agradecido pola escola no club do seu último libro, Os Metrosiderais, do que disfrutaron moito en Curuxaina.

Grazas Héctor, coma sempre!

Despedindo o ano

Toca despedir o trimestre lector e Curuxaina tivo hoxe a xuntanza a quinta e sexta hora da mañá. Coma sempre, na Biblioteca.

Houbo cinema con tres emotivas curtametraxes; houbo reparto de amizade invisible. A rapazada trouxo o seu libro favorito da casa, envolto con moito agarimo 💗💚💜 Houbo para todos os gustos.

 



Ao final, pequena merendola para despedir o ano de maneira doce e agardar que o 2022 veña cargado de lecturas viaxeiras e especiais. 
Bo Nadal á familia Curuxaina!!🎄🎄🎄

xoves, 2 de decembro de 2021

Próximo destino?

De novo o Club fai unha parada na súa viaxe, para comentar as experiencias vividas coas personaxes protagonistas dos seus libros. Unhas experiencias sempre enriquecedoras que irán gardando no seu interior como se dunha maleta se tratase.

Na xuntanza deste xoves, as bandas deseñadas de medo volveron á biblioteca e as lectoras e lectores compartiron con entusiasmo o libro que lles tocara ler. Frankenstein sorprendeu a Lía, Stranger Things deixou pegada en Tiago e Aitana desfrutou cos misterios de Moeche.

Tamén, viaxamos polo mundo, situando eses lugares que fomos percorrendo a través das viñetas deste mes. As chinchetas cravaron destinos variados e diferentes nos que soñamos as historias lidas. Que país foi o máis visitado? Seguro que, se pensades un pouquiño, acertades. A voar esa imaxinación!


Vémonos o 16 de decembro! Na quinta e sexta hora Curuxaina xuntarase para repartir un amigo invisible moi orixinal. Haberá cinema, música e merendola!! E compartiremos tempo de lecer entre todos e todas que ao final do trimestre vénnos moi ben!!!

xoves, 4 de novembro de 2021

Xuntanza de medo

Curuxainos e Curuxainas reuníronse no recreo para comentar O xardín secreto e Os metrosiderais. Parece que estas primeiras lecturas gustaron. Falouse dos personaxes, da trama e compartíronse puntos de vista.

A súa chegada á Biblioteca levaron unha sorpresa. Atoparon uns paquetiños "de medo". Que podería ser?

Ao final da sesión, Ana explicoulles que podían coller o paquete que máis lles gustase e abrilo. Dentro atopáronse unhas lecturas de medo para a próxima xuntanza. 

Vémonos o 2 de decembro!






venres, 15 de outubro de 2021

Comezamos a viaxe

Por fin, chegou o día de comezar a viaxe. Con ilusión, o alumnado "curuxaino" chegou á biblioteca para recoller o libro que o levará á cidade de A Coruña ou a Yorkshire, preto de Londres. Que aventuras correrán? Na próxima xuntanza xa nos irán contando.



xoves, 7 de outubro de 2021

Buscando aventuras

Na primeira xuntanza do Club estivemos viaxando polo mundo, para coñecer as preferencias do alumnado participante, pensando en novas aventuras lectoras. Das tres propostas para comezar a viaxe propuxeron a lectura de O xardín secreto de Frances Hodgson Burnett e Os metrosiderais de Héctor Cajaraville. Esperemos que lles gusten!!!

 






Que libro escollemos?

Na primeira xuntanza do Club de lectura ofreceremos a posibilidade de escoller entre tres lecturas. Cal será a gañadora?



mércores, 6 de outubro de 2021

Estamos de volta!

Un curso máis iniciamos a nosa andaina con moito ánimo e moitas ganas. O niño da Curuxa comeza a súa actividade cunha reunión na biblioteca este xoves. As novas coordinadoras do Club son Ana (profe de galego) e Teresa (profe de castelán). Moitas grazas por aceptar este reto.

Por certo, queremos agradecer a Raquel o traballo lector do curso pasado. Foi extraordinario! Un tempo complicado no que soubo transmitir o seu gusto pola lectura. Boa sorte no teu destino e esperamos xuntarnos pronto para falar de libros.

luns, 21 de xuño de 2021

Despedida do Club de lectura 2020/2021

Hoxe venres, 18 de xuño, remata a andaina como integrantes do club de lectura “Curuxaina” do IES Castro Alobre ata a próxima edición, polo que quedamos en xuntarnos para despedirnos.

Ao longo deste difícil curso soubemos acubillarnos baixo o resgardo que nos forneceron as páxinas dos diversos libros que fomos coñecendo e, así, sobrelevar de mellor forma a estraña e confusa situación que a pandemia que estamos a vivir xerou en todo canto nos rodea.

Non foi un reto fácil. Con todo, soubemos extraer a esencia que os clubs de lectura achegan e, malia todos os atrancos, conseguimos aprender, rir, descubrir, compartir e soñar cos libros como elemento nuclear da nosa unión.

Levamos connosco, xa para sempre, cada unha das páxinas que coñecemos grazas á lectura, pequenos tesouros que nos axudarán a construír o noso grande universo cultural, algo infranqueable. Quedan moitas historias incribles en cada un dos libros que atoparemos no camiño, agardando a que batamos con eles e as descubramos!

Grazas por todo e por tanto. Ata sempre Curuxain@s!

luns, 31 de maio de 2021

Repartimos as últimas lecturas

Hai tempo que non pasabamos polo blog para contarvos as nosas andainas, mais a actividade do “Curuxaina” non parou en ningún momento! Así que, sen máis preámbulos, aproveitamos esta ocasión para poñervos ao día de todo canto fixemos:

Na última entrada anunciabamos que estabamos a argallar algo para celebrar a Xela Arias, e así foi, pois participamos activamente nun mural colectivo que elaborou o Departamento de Lingua Galega. Nese mural engadimos algunhas mostras da nosa reinterpretación dalgúns dos versos da gran poeta que este ano se homenaxeaba a través de cartolinas con versos dela decorados con imaxes, collages e todo o que Xela inspiraba en nós.

Pasado o Día das Letras Galegas as persoas do “Curuxaina” tivemos outra xuntanza para vernos e onde estivemos a realizar un test sobre gustos lectores. Nese formulario definiamos as nosas preferencias lectoras para que a coordinadora do club escollese na biblioteca do centro cal ía ser a nosa última lectura do curso.

Finalmente, a nosa última reunión ata o momento tivo lugar o pasado venres. Alí fíxosenos entrega a cadaquén dun libro diferente que pretendía atinar cos gustos definidos no test que previamente fixeramos. Foi unha xuntanza moi divertida, porque se descubriron obras que foron acollidas con moito gusto polos participantes, todas elas comparten a premisa de seren bandas deseñadas, pois foi o xénero no que máis nos adentramos este curso ademais de que o ritmo de exames e traballos destas últimas lecturas de curso non permiten deternos en lecturas excesivamente longas... esas hai que reservalas para o verán! Tamén aproveitamos para ir devolvendo e comentando os nosos pareceres sobre os libros anteriores (Subnormal e O derradeiro libro de Emma Olsen) e quedamos en vernos nunhas semanas xa para pechar este estupendo curso no que lemos e aprendemos xuntos e xuntas. Ata daquela!