martes, 31 de xaneiro de 2017

Todo o tempo do mundo , será a próxima obra que comentaremos no grupo O niño da curuxa.

O pasado mércores 25 de xaneiro reuniuse o grupo de alumnado de 1º, 2º e 3º de ESO para decidir a próxima obra e datar a primeira xuntanza deste novo ano. Será o luns 6 de marzo e nela comentaremos a obra gañadora da última edición do premio Merlín de Literatura Infantil e Xuvenil: Todo o tempo do mundo de David Pérez Iglesias.





Achegámonos con ilusión a esta obra, desexando coñecer a Ariadna e ao seu avó Valente e gozar dos días de verán que compartiron. Xa iremos contando.

domingo, 22 de xaneiro de 2017

Encontro co poeta Carlos Negro arredor da súa obra Masculino singular.

O pasado mércores 18 de xaneiro tivo lugar na nosa biblioteca o esperado encontro co escritor Carlos Negro para falar da súa obra Masculino singular.


 O grupo do profesorado e do alumnado de 4º ESO e 1º e 2º de Bacharelato do noso club de lectura Curuxaina gozaron coas palabras coas que Carlos Negro iniciou a sesión. Palabras que falaban de emocións, de tenrura, de igualdade, pero sobre todo de poesía, da poesía que non se atopa só nos libros, senón tamén nas estacións de servizo, nos muros, pola rúa...

       


    Na conversa sobre a obra Masculino singular saíron os temas que trata : a igualdade, o feminismo, o (re)pensar a masculinidade...pero tamén o atraente que resulta a forma dos poemas, a variedade, a deconstrución..










Moit@s d@s asistentes leran outras obras do autor, como Penúltimas tendencias  e resaltaron que gozaron coa súa lectura e que conectaran moi ben con elas.




A Carlos gustoulle o encontro conxunto de alumnado e profesorado e a nós engaiolounos a súa forma de achegar a poesía. Gozamos dunha marabillosa tarde chea de palabras e onzas de chocolate.

domingo, 15 de xaneiro de 2017

O mércores 18 de xaneiro haberá unha reunión conxunta do grupo do profesorado e do alumnado de 4ºESO e 1º e 2º de Bacharelato.


Inauguramos as xuntanzas do novo ano 2017  cunha sesión moi especial. Terá lugar o mércores 18 de xaneiro ás 4.30 e nela falaremos da obra Masculino Singular co seu autor Carlos Negro.


Os grupos A curuxa sabia ( do profesorado) e A curuxa noiteira (do alumnado) temos unha cita na biblioteca do centro  para comentar a obra e conversar co seu autor. Non nos dá chegado!


Sesión dobre dos grupos de alumnado do club de lectura : Dez negriños, novela e película.


Como remate do primeiro trimestre os grupos O niño da curuxa e A curuxa noiteira reuníronse o luns 19 de decembro ás 4.30 da tarde e converteron a Bilioteca do centro nunha sala de cine.  

Antes de visualizar a película comentamos a novela: a acción, os espazos , os personaxes e sobre todo a intriga e o ritmo rápido que presenta. A valoración non puido ser máis positiva xa que tod@s @s que alí estabamos gozaramos coa lectura e por suposto recomendámola a quen queira pasar uns momentos moi agradables.









Despois  de ver a versión que en 1945 fixo René Clair da obra, valoramos a adaptación da obra na película, as diferenzas e aspectos que nos chamaran a atención: a adaptación dos personaxes, que respondían ou non a imaxe que tiñamos deles, o feito de que na película sexan indios e non negriños , como se reflexan os espazos etc...

Foi unha tarde moi agradable na que a literatura e o cine foron os protagonistas. E a próxima reunión....no 2017! 



Xuntanza do grupo A curuxa sabia para comentar a obra A ira dos mansos.


O pasado mércores 7 de decembro o grupo do profesorado do club de lectura do noso centro reuniuse para comentar a obra que obtivo o último premio Xerais : A ira dos mansos de Manuel Esteban.


As opinións foron diversas e as valoracións tamén. Destacouse como positivo a escrita áxil, a intriga, o feito de abordar un tema como a  síndrome Down, tampouco tratado na literatura galega e incluso noutras literaturas. Trátase dunha obra que ofrece a posibilidade de reflexionar moito sobre a integración das persoas con Down e, sobre todo, cando, como no caso do noso grupo, hai unha persoa que traballa e convive con elas.


Como eivas, que ao mellor non o son tanto, comentamos que as dúas historias que conforman a obra teñen un tratamento desigual, que non hai transición entre elas e que quedan moitos interrogantes e cuestións sen resolver.


Malia isto, é unha lectura que pode axudar a eliminar prexuízos, a recapacitar e, ao igual que ao inspector Carlos Manso, a superar reparos na convivencia con persoas que son , como o resto dos seres humanos, marabillosamente imperfectas.