Laura no deserto e Cárcere de Ventas, próximas lecturas do grupo do profesorado.

Dúas obras vencelladas porque versan sobre a inmensa figura de Mercedes Núñez, un ser humano excepcional que estivo presa no cárcere de Ventas e logo nun campo de concentración nazi. A súa obra autobiográfica que conta as vivencias no presidio madrileño publicada pola colección Mulleres de A Nosa Terra será a nosa próxima lectura:


Ademais leremos a marabillosa novela que converte a Mercedes Núñez nun personaxe de ficción: Laura no deserto de Antón Riveiro Coello, con quen conversaremos na nosa próxima xuntanza.

Reunión do grupo do profesorado para comentar El bar de las grandes esperanzas.

O mércores 11 de xaneiro realizamos o grupo do profesorado do club de lectura a primeira xuntanza do 2018. A obra a comentar era El bar de las grandes esperanzas de J. R. Moehringer.

Trátase dunha obra autobiogáfica que percorre a traxectoria vital de J.R, , da infancia á madurez. A carga pesada da masculinidade, o maltrato ás mulleres, a violencia, a discriminación... son temas da novela.
Son moitos os personaxes que rodean ao protagonista e o axudan a medrar, a loitar e a equivocarse, pero é un,  o espazo clave: o bar que se converte no mundo, no refuxio, no lugar ao que volver sempre.

Na xuntanza destacáronse como cualidades da obra o ben que estaba escrita, a humanidade e empatía que desprende e a sinceridade, valentía e honestidade coas que está contada a historia. Como aspectos negativos o excesivo dalgunhas descricións e o peso da realidade americana tan hiperbólica que chega a parecer inverosímil: a dependencia do alcohol, as apostas, a obsesión polo rugbi e o fútbol americano.

As referencias literarias, de Joyce a Lorca enriquecen a novela e na reunión valoráronse como un dos acertos da obra. Sen dúbida unha lectura moi recomendable malia aos inconvenientes apuntados.

Ceiba de luz de Manuel Lourenzo González, próxima obra do grupo de ESO.

Coa obra que gañou no 2017 o premio Jules Verne da editorrial Xerais imos comezar os encontros do segundo trimestre.
Xa se repartiron os exemplares da obra entre o alumnado e cando a lean tod@s teremos o noso encontro para comentala.

Encontro con Hector Cajaraville do alumnado de ESO.

Os membros do grupo de ESO do noso club de lectura Curuxaina rematamos o primeiro trimestre da mellor forma posible: cun encontro con Hector Cajaraville a propósito da súa obra A caixiña dos rancores.

Amizade, soidade, o drama dos bebés roubados, o perdón....moitos son os temas da obra e moitas tamén as preguntas que rapazas e rapaces lle fixeron ao autor. Preguntas e obsevacións, como a forma de transcribir os watshapps, a personalidade dalgúns personaxes, o espazo.....




As críticas foron construtivas e moi positivas porque a obra gustou moito e o tema principal, malia a ser tremendamente dramático resólvese cun final reparador.

Ao final tod@s coincidimos no moito que enriquecen estes encontros as lecturas das obras. Moitas grazas Hector!

El diario azul de Carlota, próxima lectura do alumnado de Bacharelato.

Iniciaremos a segunda avaliación coa lectura desta obra, seguindo coa temática de  igualdade de xénero. Neste caso, o tema principal serán os malos tratos, a violencia de xénero.

Deste xeito desde o club de lectura queremos contribuír a pór en práctica o plan coeducativo que elaboramos no curso pasado.

O grupo de Bacharelato rematou o primeiro trimestre cun encontro con Eva Mexuto, autora de 22 segundos.

O luns 18 de decembro recibimos na biblioteca do noso centro a  escritora Eva Mexuto quen falou da súa obra 22 segundos co alumnado de Bacharelato do noso club de lectura Curuxaina e tamén coas rapazas e rapaces da materia de Igualdade e Imaxe de 1º de Bacharelato.

Da obra destacouse o novidoso da temática : a transexualidade, tratada desde un punto de vista positivo, con valentía pero sen dramatismos. Calificouse como unha novela necesaria e que pode axudar a moita rapazada que se identifique co protagonista.

Acerto do título, eses simbólicos 22 segundos que son a ponte entre o privado e o público, entre o segredo e a difusión valente. Tamén o nome do protagonista, o paso de Xela a Alex, a visión que nos devolve o espello, a identidade.

Foi un encontro no que aprendemos moito da obra: das fontes, do proceso da escrita...
Encantounos coñecer a Eva Mexuto, conversar con ela. Quedamos coa sensación de que o tempo pasou rapidísimo e con moitas ganas de ler a súa próxima novela. Grazas Eva!