O grupo de ESO xuntouse para comentar Ceiba de luz.

Este luns 19 de febreiro reuniuse o alumnado dos cursos de ESO do noso club de lectura para comentar a obra que obtivo o último premio Jules Verne de literatura xuvenil : Ceiba de luz de Manuel Lourenzo González.

Unha expedición á selva amazónica do Perú é o punto de partida da obra e tamén o foi da reunión, ao imaxinar que levariamos nun "kit" de supervivencia, cales dos personaxes serían os mellores compañeir@s de tenda, como organizariamos as comidas..... e coincidiamos na boa organización que a priori tiña a aventura viaxeira da obra.

Temas como a interculturalidade , a mestizaxe, a ecoloxía, as tradicións están en Ceiba de luz, nesa busca de El Dorado, da terra prometida. Un dos acertos da historia é manter a intriga ata o final, nunha tensión narrativa que non baixa ao longo da novela.

Recomendamos Ceiba de luz e dispónomos a facer un mural sobre a obra co que contribuír ao proxecto da biblioteva docentro que neste curso ten como tema outras culturas.

Luns de Eli Ríos , próxima lectura do grupo de Bacharelato do club de lectura Curuxaina.

Se na primeira avaliación tratamos da diversidade das relacións sexuais e afectivas, neste segundo trimestre o  tema deste grupo do noso club de lectura, que queremos que sexa coeducativo, está sendo a violencia de xénero.

A próxima lectura é unha novela da escritora Eli Ríos a quen coñeciamos como poeta e que agora se estrea como narradora. Luns permitiranos aplicar moitas das reflexións da obra que vimos de ler (O diario azul de Carlota) á vida da protagonista, unha muller en quen podemos ver a vida e o sufrimento de moitas mulleres da vida real porque na ficción imos atopar a realidade coa que topamos a cotío .

Encontro do grupo de Bacharelato a propósito d´ O diario azul de Carlota.

O xoves 15 de febreiro, coma sempre na cafetería de 2 a 4h., realizouse a xuntanza do grupo de Bacharelato do noso club de lectura. A obra a comentar era O diario azul de Carlota de Gemma Lienas, unha obra moi didáctica que trata o tema da violencia de xénero enmarcada noutras violencias como o acoso escolar.
Comezamos comentando o título (o azul do ceo, do mar, da liberdade...) e a portada unha nena que pecha os ollos coas mans, quizais Amaia , personaxe ao que tanto lle custa ver o maltrato ao que está sendo sometida por parte do seu mozo ou talvez é unha nena que chora e que representa a calquera das mulleres que na obra sofren violencia ( Magali, que teme unha ablación, a profe Candela que lle confesa a Carlota que o seu pai era un maltratador...).

O didactismo da obra vén dado pola mestura dos recursos utilizados para falar da violencia de xénero e do acoso escolar: enquisas, informes, testemuños, noticias, as diapositivas do Power Point que sobre o tema está elaborando a protagonista ... e , sobre todo, pola cantidade de bibliografía (páxinas web, lecturas, películas...) que se citan en O diario azul de Carlota.

Moit@s d@s asistentes xa lerán O diario violeta de Carlota que ten como tema o feminismo e na xuntanza suxeriuse tamén a lectura do Diario vermello sobre as relacións amorosas e o Diario laranxa que ten como tema os dereitos humanos e a inmigración.

Laura no deserto e Cárcere de Ventas, próximas lecturas do grupo do profesorado.

Dúas obras vencelladas porque versan sobre a inmensa figura de Mercedes Núñez, un ser humano excepcional que estivo presa no cárcere de Ventas e logo nun campo de concentración nazi. A súa obra autobiográfica que conta as vivencias no presidio madrileño publicada pola colección Mulleres de A Nosa Terra será a nosa próxima lectura:


Ademais leremos a marabillosa novela que converte a Mercedes Núñez nun personaxe de ficción: Laura no deserto de Antón Riveiro Coello, con quen conversaremos na nosa próxima xuntanza.

Reunión do grupo do profesorado para comentar El bar de las grandes esperanzas.

O mércores 11 de xaneiro realizamos o grupo do profesorado do club de lectura a primeira xuntanza do 2018. A obra a comentar era El bar de las grandes esperanzas de J. R. Moehringer.

Trátase dunha obra autobiogáfica que percorre a traxectoria vital de J.R, , da infancia á madurez. A carga pesada da masculinidade, o maltrato ás mulleres, a violencia, a discriminación... son temas da novela.
Son moitos os personaxes que rodean ao protagonista e o axudan a medrar, a loitar e a equivocarse, pero é un,  o espazo clave: o bar que se converte no mundo, no refuxio, no lugar ao que volver sempre.

Na xuntanza destacáronse como cualidades da obra o ben que estaba escrita, a humanidade e empatía que desprende e a sinceridade, valentía e honestidade coas que está contada a historia. Como aspectos negativos o excesivo dalgunhas descricións e o peso da realidade americana tan hiperbólica que chega a parecer inverosímil: a dependencia do alcohol, as apostas, a obsesión polo rugbi e o fútbol americano.

As referencias literarias, de Joyce a Lorca enriquecen a novela e na reunión valoráronse como un dos acertos da obra. Sen dúbida unha lectura moi recomendable malia aos inconvenientes apuntados.